انا مش بقرة سعيدة بعد الان

اليوم الاول: انا مش بقرة سعيدة بعد الان ...

ده كان قرارى ..مقولتش انى هخس او هعمل رجيم قاسى انا قررت اغير نفسى انا مش بقرة من انهارده ...
جت لى حالة رقص جنونيه ...لبست الكوتشى وشغلت الموسيقى وهات يا رقص ...و انا برقص بقت الافكار عماله تتنطط فى عقلى زى العيال الصغيرة لما يوصلوا الملاهى .......

كل اللى كان فى بالى عن انى عاوزة ارجع زى زمان
عاوزة انجح
 عاوزة القى نفسى ..
ومش هعرف اعمل كده و انا حاسه بعدم الثقه فى النفس و انا شايله ضغف وزنى ..

على طول كنت احاول ازيف السعادة و اقول انا حرة و ادى لنفسى مية عذر ..
واقول انا سعيدة كده اللى بيحبنى يحبنى كده و
 اللى حوليا اللى بيجاملنى
و اللى بيتريق و يضحك
 و اللى مش مهتم اصلا ......

 لحد ما اتكشفت انى انا الوحيدة اللى مبحبش نفسى و هى كده ولازم اتغير ........

رقصت انهارده لحد ما حسيت بالتعببس بالراحة فى منفس الوقت شعور غريب و مميز ... عملت كوبايه شاى اخضر بالليمون

ودخلت ع الفيس كتبت

First day : yes,i can


ومن جوايا بكمل الجملة

I hope ... please God be with me


O.M

قلب ام موسي

عارف انت الحاله الايمانيه العميقة اللى عند بعض البشر ..و بتظهر اكتر فى وقت الشدة و المصاعب حاله من التأكد و اليقين اسمها ـــــ ربنا معانا ـــــ

ومهما حاولت اوصف قد ايه ربنا بيبقى ايده على قلب الناس اللى بتمتلك هذا اليقين مش هلاقى احسن من قلب ام موسى 

قصة سيدنا موسى و فرعون معروفه و بطلتها الاولى  هى ام موسى اللى ربنا بيوحى لها ارمى ابنك فى البحر عشان ينجى من بطش فرعون ...طب جرب انت تسيب ابنك الصغير ف الشارع ساعتين و انت مش عارف هو فين .. طب تخيل شعور ام بترمى ابنها الرضيع فى البحر بايدها و هى مش عارفه رايح فين هتشوفه تانى و لا لا ...؟ و مفيش فى بالها غير ان ربنا معانا

و يجى النص ف القرآن فى سورة القصص
((وَأَصْبَحَ فُؤَادُ أُمِّ مُوسَى فَارِغًا إِن كَادَتْ لَتُبْدِي بِهِ لَوْلا أَن رَّبَطْنَا عَلَى قَلْبِهَا لِتَكُونَ مِنَ الْمُؤْمِنِينَ))

عشان يوضح لك مدى الاسى ان قلبهااصبح فارغا بعد ما كانت قلبها مليان حب و فرحة بابنها اصبح فارغ مفيهوش غيرالخوف و الهم و الحزن و لكن الجملة اللى بعدها على طول عشان توضح الحاله اللى بتكلم عنها  و هى ان ربنا ربط على قلبها و جعلها من المؤمنين ..

و طبعا عارفين باقى القصة من اول ما
اخته تتبعه فى البحر لبيت فرعوون

زوجة فرعون تحبه 

يبحثوا له عن مرضعه 

نهايه الى 

انه ميرضاش يرضع غير من امه  

عشان يأكد لك النص القرآنى 

((فَرَدَدْنَاهُ إِلَى أُمِّهِ كَيْ تَقَرَّ عَيْنُهَا وَلا تَحْزَنَ وَلِتَعْلَمَ أَنَّ وَعْدَ اللَّهِ حَقٌّ وَلَكِنَّ أَكْثَرَهُمْ لا يَعْلَمُونَ))

و مش بس كده ده كمان ربنا يجزيها على صبرها على المحنة بـقوله تعالى
((وَلَمَّا بَلَغَ أَشُدَّهُ وَاسْتَوَى آتَيْنَاهُ حُكْمًا وَعِلْمًا وَكَذَلِكَ نَجْزِي الْمُحْسِنِينَ))

**مهما كانت شدتك اصبر و اعمل اللى عليك و قوى ايمانك بان ربنا معانا.. 

ع.م

كتاب اقراه و يعجبنى ...على سبيل السعادة

مش كتير اللى بيعرفوا قيمة سعادة امتلاك كتاب جديد يكون بين ايديك وتقراه ..بالنسبه لى كل كتاب جديد بيعتبرتجربة جديدة و لو عجبنى بحس انى كسبت صديق جديد .. فى الوقت اللى كانت امنيه

(( نفسى اقراء كتاب جديد و يعجبنى ))

كنت حاسه انى فعلا محتاجة صديق جديد  ..و بالصدفة قابلنى زاب ثروت فى طريقى عند بائع الجرايد بيقول لى حبيبتى ..

حديث داخلى  :)
(طب و الله ما انا كسفاك يا زاب ...اما نشوف ايه حكايتك ..)

و بالفعل قريت الكتاب و مبسوطة انى كسبت صديق جديد

اقتباس "انا ممكن اكره حاجات كتير فيكي..وانسى حاجات أكتر ..بس الاكيد انى هفضل احبك و لا عمرى هنساكى .

الامنيه التانيه :تم 

اكسب صديق جديد و ابسط نفسك بنفسك ..:)
ع.م 

جزمة جديدة..على سبيل السعادة

على سبيل السعاده ..
امبارح عملت حاجة كان نفسي فيها
اشتريت جزمة جديدة مريحة ملهاش اى علاقة بالكعب العالى

جزمة مش هشيل هم المشوار وانا لابساها
مش هخاف من الطرق المكسره ولا الصعبه بيها
وهمشى همشى كتير لانى بحب المشى ...........

** جميل انك تعمل حاجة بتبسطك حتى لو كانت بسيطة او غيرك شايفهاعبيطة


(( بداية موفقه لتحقيق قائمة الحاجات اللى نفسى فيها))

 ع.م

على سبيل السعادة (( ابسط نفسك مستنى ايه ؟))

كانت دى مجموعه امنيات اكتشفت انى نفسي فيها بس انا قررت انى اسعد نفسى وابدا بتنفيذها من بكره 

تحت شعار(( ابسط نفسك مستنى ايه ؟)) 

شاركونى التجربة 

ع٠م

على سبيل السعادة

دايما كانت البنت اللى بتضحك على طول بس مش اى حد يعرف يضحكها

 و لما كانوا بيسألوها"  بتحبيه كدا ازاى ..؟" ـ
كانت الاجابة .. :ـ
بـ يضحكنى من قلبي

تفاصيلى تشبه تفاصيله
بيفهمنى من غير ما احكيله
و اما احزن آوى فـ الشدة
بيعرف : يضحكنى من قلبي

 و لانى بضحك حتي فـ بكايا
ولانه فـ البكا و الضحك معايا
و بيعرف امتى محتاجه: اضحك من قلبى

فاكر لما وقعت فالطينة ..فاكره لما فضلنا طول اليوم نلف على رجلينا 

فاكر

لما مرة كان نفسى فى دبدوب :طلبت منك هدية تكون حمرا  و مكلبظه  
جبت لى بطيخة :)

 ع.م

قصاقيص حُرة

:) 

(1 )

 *
بحب لما جبهتى تلمس الارض و انا بصلى و اسمع صوت همس المصليين "سبحان ربى الاعلى"ـ
*
   بحب لما بصحى الصبح و افتح الشباك و القى الدنيا كلها نورت
*
   بحب لما بسقى زرعتى و احس انها بتأخد نفس طويل و تفرد طولها  
*
   بحب لما ماما تكون مضايقة واقعداضحكها ..و الضحك يقلب لعب وتطلع طفلة اكتر منى
* 


لما حد بتحبه يجرحك ..الجرح بالظبط زي لما حد يقفل فى وشك التليفون ..رغم ان قفل الخط بياخد ثوانى إلا انك
بتفضل مضايق فترة كل ما تمسك التليفون ..
*
  لما تبقى حزين ..وتحصل حاجة تجبربخاطرك فتحس ان ربنا بيطبطب عليك
*  

مفيش اجمل من طير طاير جنب مأذنة بيصلي فى براح السما .. لو ركزت هتسمع تسبيح جناحاته
* 
قالت حباية الخرز اللى فـ عقدى: متخافيش
ردت ضفريتى: رأسك لفوق متنحنيش .
رفض بشدة قلبى الكلام و قال: رأس البنت بتنحنى فالصلاة و حسها فوق العلا
ظهرت ابتسامتى الخجولة..غازلها رمشى : يارب تانى متختفيش
ياه قلبى يا طيب انبض آوى رجعنى اعيش
* 
قلبي عصفور حــر  لــو تحبنى بجد خليك السماء بدل ما تكون القفص.
* 
عشان خَاطري ؟!  بتقولها بعزم ما فيك ! " انا اعمل أى شئ عشان خاطركِ " و قلبى لما ضاع بايديك  مفكرتش ساعتها ليه عشان خاطري ؟
*
   لما يبقى عندك صاحب بيعرف امتى بالظبط انت محتاج انك توحشه حلو ده.. حافظ عليه .
*
  الفرحة زى غزل البنات .. طعمها مسكر و منفوشة شكلها يشد  بس خدى بالك بتدوب بسرعة .. يادوب تلحقى تاخدى لك قطمة .*
  يا شارى القلب بشـــــويةحــنان ...زود حنانك و خد عمري بالمجــــان

  ضِحكت آوى لما..
اتصل بيها مخصوص يقول لها ..انه نسي اللى كان و حب من جديد !

*   

يتبع

اختار جملتك المفضلة و تضعها فى التعليق :)

 ع.م